2017 жылы облыста 296,6 км жол салынды, оның 236,6 шақырымы Атырау қаласында. Облыс орталығында асфальттанған жолдың негізгі көлемі қала маңындағы селолық округтерге тиесілі.
Жексенбі, 5 қарашада Атырау облысының әкімі Нұрлан Ноғаев қала маңы аумағындағы жол құрылысын тексерді. Атырау қаласының әкімі Серік Шапкеновтің айтуынша, жоспарланған жол көлемі аяқтала келген, құрылыс қараша айының алғашқы жартысында бітеді.
Сонымен қатар, 2017 жылы жалпы ауданы 21 800 шаршы метр автокөлік жолына ағымдағы жөндеу жұмыстары жүргізілді. Ұзындығы 220 км болатын 207 көшенің жол-құрылыс жұмыстарына жобалау-сметалық құжаттама жасау үшін жергілікті бюджеттен 450 млн теңге бөлінген. Бұл жұмыстар 2018 жылы басталады.
«Көшелерді асфальттау жұмыстары елді мекеннің даму жоспарына сәйкес жүйелі түрде жүруі керек», деді құрылыс қарқынымен танысқан аймақ басшысы.
